Professor Məmmədhüseyn Hüseynovun “Xəttin şifrəsi” adlı kitabı təqdim edildi – FOTOLAR

Azərbaycan Milli Xalça Muzeyində əməkdar rəssam, professor Məmmədhüseyn Hüseynovun “Xəttin şifrəsi” adlı kitabının I cildi təqdim olunub. “Xəttin şifrəsi” kitabında nöqtə və xəttə əsaslanan planimetrik və stereometrik fiqurların təsnifatı verilmiş və geo-metrik fiqurlardan istifadənin insanlığın həyat və məişətində oynadığı tarixi rol geniş şəkildə şərh edilmişdir. Əsər öz unikallığı ilə seçilir.

Həyatın və dünyanın başlanğıcının rəmzi sayılan nöqtə, nöqtələr çoxluğundan yaranan müxtəlif xassəli xətlər, xətlərdən yaranan fiqurlar və fiqurların ahəngdar yerləşimindən yaranan naxışlar və sonsuz sayda kompozisiyalar müəllif tərəfindən ardıcıl şəkildə təhlilə cəlb olunub və bu həndəsi anlayışların xalçaçılıq sənətində tətbiqinə dair geniş məlumat verilib.

Mediaturk.tv xəbər verir ki,təqdimat mərasimində ölkəmizin tanınmış ziyalıları, rəssamlar və təsviri sənət üzrə görkəmli mütəxəssislər, habelə millət vəkilləri iştirak ediblər.

Təqdimat mərasimində Azərbaycan Dövlət Rəssamlıq Akademiyasının rektoru Natiq Əliyev, millət vəkilləri Cavanşir Feyziyev, Fazil Mustafa, Sabir Rüstəmxanlı, Məlahıt İbrahimqızı, akademik Qəzənfər Paşayev və müəllifin sənət dostları çıxış edərək görkəmli alim, professor Məmmədhüseyn Hüseynovu yeni kitabının nəşr olunması münasibətilə təbrik edib, ona yeni yaradıcılıq uğurları arzulayıblar.