\"Ozbekiston\" TV-nin növbəti verilişi Heydər Əliyev adına mərkəzin fəaliyyətinə həsr olunub

"Ozbekiston" televiziya kanalının "Dostluq körpüsünün parlaq ulduzu" verilişi Heydər Əliyev adına Azərbaycan Mədəniyyət Mərkəzinin fəaliyyətinə həsr olunub.

MediaTurk TV  xəbər verir ki, televiziya verilişində xalqlarımız arasında tarixi dostluq, Azərbaycanla əməkdaşlığın indiki səviyyəsi haqqında danışılır, AMM-nin fəaliyyətinə nəzər salınır.

Mərkəzin direktoru Samir Abbasov Azərbaycan xalqının ümummilli lideri Heydər Əliyevin adını daşıyan mədəniyyət ocağının ölkələrimiz arasında dostluğun, əməkdaşlığın inkişafında və möhkəmlənməsində həyata keçirdiyi layihələrdən danışıb.

Samir Abbasov müsahibədə vurğulayıb ki, Mədəniyyət Mərkəzi Özbəkistanın bir çox şəhərlərində ölkəmizin milli mədəniyyətinin təbliği istiqamətində çoxsaylı layihələr həyata keçirir. O bu yaxınlarda Özbəkistanın Qaraqalpaqstan Respublikasında və Xarəzm vilayətində keçirilən Azərbaycanın mədəniyyət və ədəbiyyat günləri haqqında danışaraq belə tədbirlərin böyük əhəmiyyətini qeyd edib.

S.Abbasov bu ilin dekabr ayında hər iki ölkənin alim, tarixçi, sənətşünas və ədəbiyyatşünaslarının iştirakı ilə Özbəkistanda “Nizami Gəncəvi və Əlişir Nəvai ədəbiyyat və sənət günləri”nin keçirilməsinin planlaşdırıldığını qeyd edib. O, dövlətlərimiz arasında yalnız mədəniyyət sahəsində deyil, iqtisadiyyat və siyasət sahəsində də uğurlu inkişafın olduğunu vurğulayıb. O, ölkələrimizin böyük turizm potensialına malik olduğunu söyləyərək postpandemiya dövründə də turizm sahəsində birgə planların və layihələrin həyata keçiriləcəyinə əminliyini ifadə edib.

Verilişdə AMM-nin Azərbaycan tarixi və dövlətçiliyi muzeyinin eksponatlarına nəzər salınıb, mərkəzin əməkdaşı Kifayət Pirməmmədova eksponatlar haqqında məlumat verib, görkəmli şəxsiyyətlər, arxiv materialları haqqında söhbət açıb.

Proqramda Mədəniyyət Mərkəzindəki xalça muzeyi haqqında da məlumat verilib, qeyd olunub ki, xalçaçılıq Azərbaycanın qədim və zəngin mədəniyyətə malik olmasını göstərməklə yanaşı xalqımızın xüsusi istedadını nümayiş etdirir.

Bundan əlavə verilişdə Qarabağ bölgəsinin zəngin milli geyim kolleksiyası nümayiş etdirilib, libasların Özbəkistanda çoxsaylı beynəlxalq tədbirlərdə sərgiləndiyi qeyd olunub.

Sonda Mədəniyyət Mərkəzinin “Azərbaycan qızları” rəqs ansamblının ifasında milli rəqslərimiz nümayiş etdirilib.