“Cəhənnəm qapıları”na yaxınlaşmaq QADAĞANDIR

Türkmənistan sakinlərinə Karakum səhrasındakı “Cəhənnəm qapıları” qaz kraterinə xüsusi icazə olmadan baş çəkmək qadağan edilib. Bu barədə “Xronika Türkmənistan” məlumat yayıb.

Bu məşhur turistik məkan 1971-ci ildə sovet geoloqları bu yerdə yeraltı qazın yığılmasını aşkar etdikdən sonra yaranıb. Quraşdırılmış neft qurğusu dərin krater əmələ gətirərək boşluğa düşüb. İnsanlara və mal-qaraya zərərli qazların çıxmaması üçün onları yandırmaq qərarına gəliblər. Geoloqlar yanğının bir neçə günə sönəcəyini güman edirdilər, lakin yanıldılar. 50 ildir ki, kraterdən çıxan qaz fasiləsiz olaraq gecə-gündüz yanır.

İndi buranı yalnız “Türkmensyahat” (“Türkmensyýahat”) Dövlət Turizm Korporasiyasının icazəsi ilə qrup halında ziyarət etmək mümkündür.

Polis əməkdaşları kraterdə postlar qurub və yerli sakinlərə xəbərdarlıq ediblər ki, indi kraterə yaxınlaşmaq qadağandır.

Naməlum səbəblərdən bu qadağa turistlərə şamil edilmir.