Qırğızıstan hərbçiləri Tacikistanda

Tacikistanın Faxrobod hərbi poliqonunda “Kobalt-2021” xüsusi taktiki təlimləri keçirilib. Bu barədə Qırğızıstan Daxili İşlər Nazirliyinin mətbuat xidmətindən məlumat verilib.

Təlimlərə daxili işlər nazirliklərinin xüsusi təyinatlı bölmələri və Kollektiv Təhlükəsizlik Müqaviləsi Təşkilatının Kollektiv Çevik Hərəkat Qüvvələri cəlb olunub.

Ermənistan, Belarus, Qırğızıstan, Qazaxıstan, Rusiya və Tacikistanın hüquq-mühafizə orqanlarının əməkdaşları və hərbçiləri qanunsuz silahlı birləşmələrin məhv edilməsi üzrə əməliyyatların planlaşdırılması və keçirilməsi üzərində işləyiblər.

Təlimdə Qırğızıstan Daxili İşlər Nazirliyinin rəhbərliyindən idarənin rəis müavini Oktyabr Urmambetov iştirak edib.

“Transmilli cinayətkarlıq, ekstremizm və narkotiklərlə bağlı cinayətlərin beynəlxalq miqyas alması, sülhə, təhlükəsizliyə və əmin-amanlığa təhlükə yarandığı bir dövrdə xüsusi əhəmiyyət kəsb edən Kollektiv Qüvvələrin döyüş hazırlığının qorunması və birgə fəaliyyət təcrübəsinin əldə olunması üçün xüsusi təlimlər çox vacibdir . Əminəm ki, keçirilən təlimlər cinayətkarlıqla mübarizəyə mühüm töhfə verəcək,

dövlətlərimizdə sabitliyin və əmin-amanlığın qorunmasına xidmət edəcək ”, - deyə  Urmambetov bildirib.

Oktyabr Urmambetov bildirib ki, Qırğızıstanda növbəti “Kobalt-2022” taktiki və xüsusi təlimləri planlaşdırılır.