Azərbaycanın Qazaxıstandakı səfiri Beynəlxalq Türk Akademiyasını ziyarət edib

Bu gün Beynəlxalq Türk Akademiyasının prezidenti Darxan Kıdırəli Azərbaycan Respublikasının Qazaxıstan Respublikasındakı fövqəladə və səlahiyyətli səfiri Ağalar Atamoğlanov ilə görüşüb.

Görüş zamanı türk ölkələri arasında əməkdaşlıq məsələləri, bu istiqamətdə görülən işlər və gələcək planlar müzakirə olunub.

Səfir Ağalar Atamoğlanov Azərbaycan tərəfinin Türk Akademiyasının əhəmiyyətli təşəbbüslərini dəstəklədiyini bildirib, həyata keçirdiyi layihələrə görə təşəkkürünü ifadə edib və qurumun işinə uğurlar arzulayıb.

Akademiya prezidenti Darxan Kıdırəli öz növbəsində səfirə Akademiyaya xüsusi ziyarətinə görə təşəkkür edib, qarşıdan gələn Yeni il və 31 dekabr - Dünya Azərbaycanlılarının Həmrəyliyi Günü münasibətilə təbriklərini çatdırıb. 

D.Kıdırəli səfir A.Atamoğlanova Nizami Gəncəvinin qazax dilində Akademiya tərəfindən nəşr olunmuş, “Leyli və Məcnun”, “Yeddi gözəl” əsərlərinin yer aldığı yeni kitabını və Əlişir Nəvayinin Azərbaycan dilində çapdan çıxan “Seçilmiş əsərləri”ni təqdim edib. 

Akademiya rəhbəri bildirib ki, Türk Akademiyası 2022-ci ildə Hüseyn Cavid, Əhməd Cavad, Mirzə Fətəli Axundzadə kimi Azərbaycan xalqının dahi şəxsiyyətlərinin yubileylərini yüksək səviyyədə qeyd etməyi planlaşdırır.