“Bu, həm cinayət, həm də bizə təhqirdir"

“Toponimlərimizin əcaib erməni adları ilə dəyişdirilməsi həm cinayət, həm də bizim üçün təhqirdir”.  Tarixçi alim, toponimlərə dair 70-dən çox kitabın müəllifi Nazim Tapdıqoğlu MediaTürk TV-yə müsahibəsində belə deyib.

“Toponimlərin izi ilə” verilişinin qonağı olan N.Tapdıqoğlu bildirib ki, keçmiş Dağlıq Qarabağ muxtar vilayətindəki 230 yaşayış məntəqəsinin 80 faizinin adı türkmənşəli adlar olub. Lakin işğal dövründə ermənilər 900 kənddən 400-nün adını dəyişiblər: “Bu proses hələ işğaldan əvvəl başlayıb. 1936, 1938, 1978-ci illərdə, 91-ci ildə, hətta müharibənin gedişində də bizim yer adlarını dəyişib əcaib adlar qoyublar. İbrahimxəlil xan tərəfindən 1788-1789-cu illərdə tikilən Əsgəran qalasının adının “Mayraberd” qoyulması Azərbaycan xalqının, övladının heysiyyətinə toxunmaqdır. Bu, beynəlxalq cinayətdir və BMT buna öz qiymətini verməlidir”.

2000-ci ilin əvvəllərində ermənilər hətta işğal etdikləri Azərbaycan ərazilərində hidronim və oykonimləri – çay, bulaq, təpə adlarını da dəyişiblər.  Alim hesab edir ki, məsələ ilə bağı beynəlxalq qurumlara fasiləsiz olaraq müraciət etmək və ermənilərin bu cinayətə görə cəzalandırılmasına nail olmaq lazımdır.

Proqram "İnsan Hüquqları üzrə Monitorinq və Maarifləndirmə Mərkəzi" ictimai birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirdiyi layihə çərçivəsində hazırlanıb. “Erməni təcavüzü ilə üzləşən toponimlərimizin tarixi ilə bağlı təbliğatın aparılması” layihəsinin məqsədi Qərbi Azərbaycan bölgəsindəki ərazilərin tarixi və toponomikasını təbliğ etmək, bu haqda tarixi faktları açıqlamaq, mövcud maddi sübutları ictimaiyyətə çatdırmaqdan ibarətdir.

Layihə çərçivəsində 3 ay ərzində MediaTürk TV-də mövzuya dair müxtəlif səpkili beş proqram hazırlanıb. Proqramlarda millət vəkilləri Musa Qasımlı, Əziz Ələkbərli, tarixçi alimlər Cəbi Bəhramov, Nazim Mustafa, Firdovsiyyə Əhmədova, Rizvan Hüseynov, Qafar Çaxmaqlı çıxış ediblər. Qonaqlar Zəngəzur mahalının tarixi, bu bölgədəki ərazilərin ermənilərə verilməsi haqqında tarixi məlumatları açıqlayıblar. Hazırlanmış yazılarda Qərbi Azərbaycanda dəyişdirilmiş türk adlarının, həmçinin Qərbi Azərbaycanda azərbaycanlıların yaşadığı kəndlərdə olan tarixi abidələrin rayonlar üzrə siyahısının təqdim olunub.