Nur-Sultandan Bakıya uçuşlar bərpa edilib

Qazaxıstanın paytaxtı Nur-Sultan şəhərindən Bakıya təyyarə reysləri bərpa olunub.

Bu barədə Qazaxıstanın Mülki Aviasiya Komitəsi məlumat yayıb.

Bildirilib ki, yanvarın 13-dən Nur-Sultandan 32 beynəlxalq aviareysin reallaşması planlaşdırılıb:

Moskva, Yekaterinburq, Novosibirsk (Rusiya), Budapeşt (Macarıstan), İstanbul (Türkiyə), Minsk (Belarus), Varşava (Polşa), Bakı (Azərbaycan), Kiyev (Ukrayna), Daşkənd və Pxuket (Özbəkistan) və Kolombo (Şri Lanka).

Bildirilib ki, yuxarıda qeyd olunan uçuşlar geri də icra olunacaq. Yalnız Frankfurt (Almaniya) uçuşu təxirə salınıb. 

Məlumata görə, Luftansa aviaşirkətinin reysləri istisna olunmaqla Nur-Sultandan bütün beynəlxalq uçuşlar bərpa olunub.

Bundan başqa, baş verən etiraz aksiyaları və iğtişaşlardan sonra yanvarın 13-də Qazaxıstanın Almatı hava limanı ilk beynəlxalq reysi qəbul edib. Belə ki, Türkiyənin Antalya şəhərindən havaya qalxan təyyarə Almatıda yerə enib.

Qeyd edək ki, yanvarın 5-də Almatı şəhərində baş verən hadisələrə görə beynəlxalq hava limanı da fəaliyyətini dayandırmışdı.